Xəbər verdiyimiz kimi, bu gün Publika.Az saytına yeni baş redaktor, aktyor Elməddin Cəfərov təyin olunub

Elməddin Cəfərov sayta tək deyil, “Bacanaqlar” serialının aktyorları - ""Şıdırğı" qəzetinin baş redaktoru", aktyor Teymur Məmmədov və Elnur Hüseynov ilə birlikdə gəlmişdi.

E.Cəfərov iclas çağıraraq, redaksiyanın yaradıcı kollektivi ilə tanış olduqdan sonra, təkliflərini bildirdi və göstərişlərini verdi.

Baş redaktor Elməddin Cəfərovun təkliflərini olduğu kimi təqdim edirik:

"Özümün saytım olub, amma başqası idarə edib. Az-çox bu işlərdən başım çıxır. Bu gün Əvəz müəllim (Əvəz Qurbanlı-Publika.Az saytının redaktoru) mənim əvəzimə danışsın. Ona görə də istəyirəm ki, Əvəz müəllim yanımda əyləşsin.

1. Bu həftə siyasət bölməsində xarici siyasətə daha çox yer ayıraq. Bu günlərdə Suriyada bir kənd yer üzündən silindi.

2. İranda həbs olan iki şairlərimiz haqqında ümumi məlumat yazılsın.

3. Status-kvo məsələsinə də toxunun. Politoloqların biri ilə söhbət edin

4. Sosial sahədə diffamasiya məsələsi haqda... jurnalistlərə qarşı zor tətbiqi məni çox narahat edir. Jurnalistlərin azadlığı, toxunulmazlığı və hüquqları barəsində xəbərlər yazılsın. Bu məsələni gündəmdə saxlayın.

5. Avtobus sürücülərilə sərnişinlərin və ümumiyyətlə, sürücülərlə piyadaların münasibətləri haqqında mütləq yazılsın.

6. Təhsilə də yer ayırın...

7. Şəhərin zibilqabı məsələsinə də toxunun...

8. İdman bölməsində FIFA U-17 qadınlararası dünya çempionatı haqqında və qarşıdan gələn Olimpiada ilə bağlı xəbərlərə daha geniş yer ayırın.

9. “Bacanaqlar” serialına gələn Fərda Xudaverdiyev ilə Elməddin Cəfərov münasibətləri haqqında... Teymur Əmrahın evlənməsi xəbəri də diqqətimi çəkdi. Bu barədə də...

10. İqtisadiyyatla bağlı “RoyalBank”ın bağlanması, ümumiyyətlə, bankların fəaliyyəti çox maraqlıdır. Bu mövzunu da işləmək olar.

11. Kənd təsərrüfatı məhsullarının çürüməsi və istifadəyə yararlı olmamasının qarşısını almaq üçün nə işlər görülür? Bu prosesi araşdırın. Bazarlarda qiymətlərin süni qaldırılması məsələsini də...

12. Xarici ölkələrin köşə yazarlarını izləyirəm. Elə yazıları bizdə yazmaq mümkündürmü? Mən istənilən mövzuya hərtərəfli yanaşılmasını tərəfdarıyam. Bizdəki yazarlar isə mövzuya 4 tərəfdən ərkyana yanaşıb, elə yazırlar ki... ona görə də köşə yazarlarımızdan heç kimi oxumuram”, - baş redaktor bunu deyib, iclası bitirdi. Sonra kollektivlə iş başında tanış olmaq üçün otaqlara keçdi.

Qeyd edək ki, baş redaktor E.Cəfərovun tapşırıqları ilə bağlı materialları bu gündən etibarən Publika.Az-ın saytında oxuya bilərsiniz.

Fuad Mədətov
Publika.Az